Нивото на триглицериди се смета за важна мерка за здравјето на срцето, а кога вредностите на овие масти стануваат високи, постои ризик од многу болести.
Триглицеридите, покрај високиот холестерол, се на врвот на листата на „виновници“ за срцевите заболувања, всушност, се сметаат за важна мерка за здравјето на срцето. По дефиниција, триглицеридите се вид на масти (липиди) кои се наоѓаат во нашата крв. Кога јадеме, нашето тело ги претвора сите калории, кои не треба веднаш да се користат, во триглицериди, кои се складираат во нашите масни клетки. Подоцна, хормоните ослободуваат триглицериди помеѓу оброците. И холестеролот и триглицеридите се масти во крвта, а кога нивото на овие липиди ќе стане превисоко, тие можат да го зголемат ризикот од срцев и мозочен удар.
Триглицеридите се најчестиот тип на маснотии во телото. Телото го добива најголемиот дел од своите триглицериди од храната што ја јадеме, но нашето тело може да произведува и триглицериди. Доколку редовно внесуваме повеќе калории од храната отколку што согоруваме, особено од храна богата со јаглехидрати, веројатно е дека нивото на триглицериди ќе биде високо, односно хипертриглицеридемија. Значи, триглицеридите се исклучително важни за здравјето на луѓето, а ова се 7-те најважни факти за триглицеридите кои треба да ги знаеме.
- Алкохолот има големо влијание врз нивото на триглицериди – Честа причина за високите триглицериди е исхраната богата со масти и прекумерното внесување алкохол. Се препорачува луѓето со високи триглицериди да консумираат само умерени количини на алкохол, или воопшто да не консумираат, во некои случаи. Алкохолот може силно да влијае на нивото на триглицериди, бидејќи има многу калории и шеќер.
- Дијабетесот може да влијае на нивото на триглицериди – Високите триглицериди може да се поврзат со висок шеќер во крвта. Зголемените триглицериди и високиот шеќер во крвта се поврзани со метаболички синдром – преддијабетес и дијабетес тип 2. Доколку имате висок крвен притисок, висок шеќер во крвта, вишок маснотии околу половината, висок холестерол и високи триглицериди, сето тоа во исто време, сметаат лекарите метаболички синдром, кој го зголемува ризикот од срцеви заболувања и мозочен удар.
- Здравиот начин на живот ги намалува триглицеридите – Ова правило важи во сите случаи, кои се однесуваат на здравјето, но може да се случи, иако водите здрав начин на живот, сепак да имате високи триглицериди. Слично на нивото на холестерол, нивоата на триглицериди може да се намалат со здрава и хранлива исхрана и редовно вежбање. Понекогаш здравиот живот нема да биде доволен за да го доведе нивото на триглицериди на прифатливо ниво, особено во случаи кога лицето има генетска предиспозиција за високи нивоа на триглицериди. Исто така, црниот дроб може прекумерно да произведува триглицериди , во кој случај може да биде индицирана терапијата со лекови.
- Зголеменото ниво на триглицериди може да го зголеми ризикот од срцеви заболувања – Високите триглицериди може да придонесат за стврднување на артериите или задебелување на артериските ѕидови. Има се повеќе докази за поддршка на фактот дека покачените триглицериди се поврзани со ризик од кардиоваскуларни болести, без оглед на нивото на „лошиот“ холестерол.
- Високите триглицериди може да бидат знак за други здравствени проблеми – Високите триглицериди може да се поврзат со дебелина, ниски нивоа на тироидни хормони и проблеми со црниот дроб или бубрезите, како што е безалкохолното масно заболување на црниот дроб, инаку водечка причина за откажување на црниот дроб.
- Одредени лекови може да го зголемат нивото на триглицериди – Некои апчиња за контрацепција, стероиди, лекови за ХИВ и бета-блокатори исто така може да го зголемат нивото на триглицериди. Во некои случаи, вашиот лекар може да ви препише друг лек ако вашата тековна терапија влијае на нивото на триглицериди.
- Триглицеридите исто така можат да го оштетат панкреасот – Студијата објавена во јануари 2020 година сугерира дека триглицеридите може да играат важна улога во сите видови состојби поврзани со атеросклероза, како што се коронарна артериска болест, мозочен удар, срцев удар, исто како и холестеролот. Студијата исто така покажа дека многу високи нивоа на триглицериди може да го оштетат панкреасот, па дури и да предизвикаат кожни нарушувања.
Не дозволувајте овие факти да ве обесхрабрат
Добрата вест е што лекарот лесно може да го провери нивото на триглицериди со едноставен тест на крвта, а промените во животниот стил можат да го намалат нивото на овие супстанции. Бидејќи триглицеридите се многу зависни од исхраната, храната со малку маснотии може да биде доволна за нормализирање на нивото на триглицериди кај некои луѓе. Така, промените во исхраната, поголема физичка активност и губење на тежината може да доведат до прилично драстично намалување на триглицеридите. И ако тие промени не се доволни, лековите можат да помогнат во нормализирање на нивото на триглицериди.
