Одредена количина на јод во телото е неопходна за правилно функционирање на тироидната жлезда, која го контролира метаболизмот и другите важни функции во телото.
Ниското ниво на јод не е единствената причина за лошата функција на тироидната жлезда, но недостатокот на јод може да предизвика абнормално зголемување на тироидната жлезда и други проблеми со оваа жлезда.
Може да предизвика ментални нарушувања кај децата, пишува Healthline.
Храна која содржи јод
Вашето тело не произведува јод по природен пат, така што единствениот начин да ја добиете оваа хранлива материја е преку исхрана. Возрасните обично имаат потреба од 150 микрограми (mcg) дневно. На бремените и доилките им требаат 200 mcg дневно.
Јодот се наоѓа во многу намирници. Најмногу е концентриран во храната како риба, јајца, јаткасти плодови, месо, млечни производи, алги и јодирана кујнска сол.
Недостаток на јод
Недостатокот на јод погодува околу две милијарди луѓе ширум светот. Најчесто е во земјите во развој каде што луѓето можеби немаат пристап до доволно здрава храна. Но, тоа може да влијае и на луѓето во развиените земји кои немаат соодветна исхрана или чии тела не го обработуваат јодот правилно.
На бремените жени им треба повеќе јод од која било друга група луѓе. Затоа, веројатно ќе имаат недостаток доколку не консумираат храна богата со јод.
Главниот показател дека на телото му недостасува јод е отекувањето на тироидната жлезда во вратот, што може да предизвика формирање на видливи грутки на вратот.
Недостатокот на јод е индициран и со ниско ниво на хормони, хипотироидизам, кој обично предизвикува симптоми кои вклучуваат замор, зголемена чувствителност на студ, запек, сува кожа, зголемување на телесната тежина, надуено лице, мускулна слабост, висок холестерол во крвта, болка или вкочанетост во мускулите и зглобовите.
Нарушувања и компликации со недостаток на јод
Доколку не се лекува, дефицитот на јод може да доведе до тежок хипотироидизам. Компликациите може да вклучуваат срцеви заболувања и сродни нарушувања, како што се зголемено срце и срцева слабост.
Кога станува збор за менталното здравје, се јавува депресија како и когнитивно оштетување. Потоа, оштетување на периферните нерви, познато како периферна невропатија.
Има и проблеми со овулацијата што може да предизвика неплодност кај жените.
Кај трудниците може да го зголеми ризикот од вродени дефекти кај новороденчињата, спонтани абортуси, но и предвремено породување.
