Најновото истражување покажа дека секој ден несвесно внесуваме во нашето тело повеќе од 900 парчиња мала пластика или таканаречена микропластика. Тоа се мали парчиња пластика кои го загадуваат воздухот, водата и храната што ја јадеме. Така, научниците открија дека носиме микропластика во нашиот крвоток, но сè уште не е јасно колку всушност е опасно за здравјето на луѓето.
„Микропластиката се мали парчиња пластика, обично долги околу пет милиметри, а се создаваат кога пластичните производи се распаѓаат во околината. Со оглед на тоа што пластиката не може да биде биоразградена, таа прво се распаѓа на многу помали парчиња. Микропластиката обично доаѓа од пластични производи што ги фрламе, а кои завршуваат расфрлани на копно и океани каде што се изложени на водни струи, ветер и сончева светлина“, објаснува специјалистот за медицинска токсикологија Кели Џонсон-Арбор.
Не сме ни свесни дека внесуваме парчиња пластика
„Со оглед на тоа што микропластиката е ситна, ние ја консумираме без воопшто да го сфатиме тоа. Има се повеќе извештаи за микропластична контаминација во нашата вода за пиење, млеко, храна и воздух“, објаснува токсикологот Дик Ветаак. Најновата холандска студија од 2021 година проценува дека денешните деца внесуваат повеќе од 500 парчиња микропластика дневно, додека возрасните внесуваат дури повеќе од 900.
„И додека поголемиот дел од микропластиката што ја консумираме патува низ нашиот дигестивен тракт и завршува во нашиот измет, мал дел од ситната микропластика, наречена нанопластика, поминува низ бариерите на нашите бели дробови и цревата и влегува во нашиот крвоток“, додава Ветаак. Студијата спроведена на почетокот на 2022 година во Холандија го поддржа ова, наоѓајќи докази за микропластика во човечката крв.
Се уште не се познати последиците по здравјето
Експертите сè уште не знаат колку всушност микропластиката е опасна за нашето здравје или какви се сите последици. За да се добијат тие информации, велат тие, треба да се направат повеќе истражувања за тоа како човечкото тело ја вари и исфрла микропластиката. Претходните истражувања на животни покажаа дека изложеноста на микропластика може да предизвика бројни воспаленија и нарушување на хормоните.
Научниците предупредуваат дека постојат неколку големи здравствени проблеми кои според досегашните информации би можеле да бидат поврзани со микропластиката, а тоа се развој на рак, дигестивни проблеми, инфекции и оштетување на органите.
