Во смислувањето нови и донекаде егзотични јадења или збогатување на традиционалните, во создавањето топла и миризлива средина во вашиот дом, но и во заштитата на вашето здравје – зимските зачини ќе ви бидат вредни сојузници во сето тоа. Еден од нив е морско оревче. Овој зачин се добива од семето на тропското зимзелено морско оревче кое расте во топлите региони на Бразил, Индонезија и Карибите.
Во тропските предели, од каде што потекнува, морското оревче е многу популарен додаток на слатки јадења или разни мешавини за зачини, како што е гарам масала, додека во европските кујни најчесто се користи за време на зимските празници, а често се користи и како афродизијак. Слатко и миризливо, на јадењата им дава посебна топлина која е особено добредојдена во студените зимски денови и празничната атмосфера.
Покрај подготовката на десерти, во нашите краишта се користи и за зачинување на солени јадења, особено јадења со компири, месо, блитва, спанаќ, зелка и моркови, како и крем супа (пробајте морско оревче во крем од тиква или сладок компир супа и нема да зажалите). Тој е незаменлив зачин во подготовката на бешамел сос, а ќе го подобри секој сос на база на печурки и сирење, давајќи им полн вкус. Корисен совет е да додадете свежо рендано морско оревче на самиот крај на готвењето бидејќи превисоката температура го ослабува неговиот вкус.
Нутритивно богат
Крцкавите колачиња и бисквити во кои често уживаме во студените месеци и празници ќе бидат уште поароматични и повкусни доколку морското оревче се додаде на вообичаените зимски зачини како цимет и ванила. Но, нотката морско оревче додадена во смесата ќе ги направи посебни и најобичните палачинки. Освен што ги прави јадењата вкусни, морското оревче ги збогатува и нутритивно бидејќи содржи калциум, магнезиум, цинк, бакар, фосфор, фолна киселина, витамин Б1.
Диетални влакна
Покрај тоа, тој е извор на диетални влакна, па го олеснува варењето и ги ублажува желудочните киселини. Ако не сте знаеле, морското оревче може да ви помогне и да заспиете: само додадете прстофат рендано морско оревче во чаша топло млеко и испијте го пред спиење.
