Пониските температури со себе носат почести настинки кои можат да предизвикаат и кашлање. Иако лекарот треба да ја утврди дијагнозата и начинот на лекување, постојат природни лекови како мед, мајчина душица и ѓумбир кои можат да ја спречат оваа непријатна појава.
Кашлањето е природен рефлекс кој се јавува кога нешто ви го иритира грлото или дишните патишта. Повремената кашлица е нормална, па дури и здрава, бидејќи му помага на телото да ги исфрли наталожените слуз и остатоци. Сепак, тоа не го прави помалку болно или исцрпувачко.
Најчести причини за кашлица се: иритација предизвикана од цигари, бактериски инфекции, алергии, астма, вирусни заболувања како настинка или грип.
Кашлицата предизвикана од астма, инфекции и алергии треба да ја лекува лекар, но ако таа опстојува по вирусна инфекција или е резултат на иритација, еве неколку природни состојки кои ќе ви помогнат да ја лекувате дома:
Мед
Медот делува слично како капките за кашлица – кога се консумира, ја обложува слузницата на грлото, ублажувајќи ја болката или гребењето. Студијата од 2007 година објавена во списанието Архиви на педијатриска и адолесцентна медицина покажа дека медот е поефикасен во лекувањето на ноќната кашлица отколку декстрометорфан, вообичаен лек за кашлица.
Медот, исто така, има антиинфламаторни, антиоксидантни и антибактериски својства – што може да придонесе за неговото смирувачко дејство. Овие својства помагаат во борбата против инфекциите и можат да го зајакнат имунолошкиот систем.
Гаргарањето со солена вода може да помогне да се убијат бактериите и да се олабави слузта во грлото. Олабавувањето на слузта во грлото ќе ви помогне да ги исчистите синусите и побрзо да се ослободите од кашлицата. Солената вода, исто така, може да помогне да се намали отокот и иритацијата предизвикана од постојана кашлица.
Ѓумбир
Ѓумбирот е тропска билка која најчесто се користи како додаток во исхраната. Може да помогне во лекувањето на различни здравствени проблеми, а како медот, биоактивните соединенија во ѓумбирот имаат антиоксидантни, антимикробни и антиинфламаторни својства.
Ѓумбирот има и зачинет вкус, кој го стимулира производството на плунка и може да помогне при сува уста или грло.
Корен од бел слез
Коренот од бел слез е хербален додаток за кој се смета дека ги смирува иритираните мукозни мембрани кои се наоѓаат во грлото и устата. Корените и листовите на бел слез содржат слуз што кога се меша со вода формира текстура слична на гел што може да го обложи грлото, слично на медот.
Студијата од 2018 година објавена во Комплементарни медицински истражувања со над 800 учесници покажа дека и пастилите и екстрактот од корен од бел слез помагаат во лекувањето на сува кашлица. Повеќето учесници забележале подобрување на нивните симптоми во рок од 10 минути по земањето на екстрактот.
Мајчина душица
Мајчината душица е билка за која се смета дека ги смирува мускулните грчеви, вклучувајќи ги и оние предизвикани од кашлање.
Студија од 2006 година објавена во германското списание Drug Research покажа дека комбинираниот третман на мајчина душица и бршлен ја ублажува кашлицата и другите симптоми на акутен бронхитис. За ублажување на кашлицата, може да се конзумира како билен чај или во форма на таблети.
