Коронавирусот ги промени животите на многумина, а новото нормално е реалност со која штотуку учиме да се справуваме. Дел од овие промени за некои, за жал, беше и губењето на работното место.
Прекините, отпуштањата и помалите примања беа причина за многумина појава на вознемиреност, црни мисли и негативен поглед на иднината. Истражувањата покажаа дека луѓето кои имаат финансиски и деловни проблеми имаат 50 отсто поголеми шанси за разни психички заболувања.
Овој факт не не чуди бидејќи ненадејното губење на работното место и прекинот на паричните приливи најчесто ги погодува луѓето со пренесување на стравот од моменталната ситуација во иднината.
Размислувањето за иднината во негативен контекст создава маѓепсан круг од кој е тешко да се излезе и кој го спречува човекот да се ослободи. Ако вашата моментална финансиска ситуација ви врши притисок и акумулирате негативни емоции поради недостаток на пари, најдете упатства подолу кои ќе ви помогнат да ги ослободите таквите емоции.
Фокусирајте се на сегашниот момент
Постојаното размислување за иднината е заморно дури и кога не го мислиме најлошото. За да се вратите во сегашниот момент едноставно престанете да ги анализирате минатите моменти и да размислувате за можни сценарија. Присуството е многу важно за, пред сè, да се одморите, а потоа да најдете начин да излезете од лошата финансиска состојба.
Добрите идеи доаѓаат кај луѓе кои слушаат, чувствуваат и се самосвесни. Ако ве фати во вител на лоши мисли кои тешко се контролираат, дишете длабоко. Ова е првиот чекор што ќе го преземете за да станете свесни и да ја прифатите вашата состојба.
Спијте мирно
Стресот често е причина за многу непроспиени ноќи. За да ја исчистите главата од тешките мисли пред спиење, тренирајте, прошетајте или запишете сè што ве мачи на едно парче хартија.
Луѓето кои имаат проблеми со спиењето поради стрес честопати ги советуваат психолозите едноставно да почнат да бројат до илјада, фокусирајќи се само на бројките. Тоа е метод кој, ако навистина се фокусирате на броењето, секогаш ќе функционира.
Најдете време да се опуштите
Луѓето кои добиваат отказ често се чувствуваат помалку вредни и поради тоа чувство се заплеткуваат во мислите за наоѓање решение и стравуваат за иднината. Доколку сте доживеале некој деловен или финансиски проблем, немојте да си го одрекувате одморот и опуштањето.
Дозволете си прошетка, препуштете се на правење колачи кои ве релаксираат, препуштете се на нарачување вечера, читање книга или маратон гледајќи серија. За да дојдете до потенцијално решение, важно е да се одморите од лошите мисли, да наспиете малку и, конечно, да го прифатите сегашниот момент за да можете да работите на подобра и поубава иднина.
